Aqtaý qalasynda 1 sáýir kúni velosherý ótti. Shara Elbasynyń «Bolashaqqa baǵdar: rýhanı jańǵyrý» baǵdarlamasyn iske asyrý maqsatynda jáne Elordamyz Astana qalasynyń 20 jyldyq mereıtoıy qarsańynda uıymdastyryldy.
Velosport maýsymynyń ashylýyna Aqtaý qalasynyń 300-ge jýyq turǵyny qatysty. 35 shaǵyn aýdannan bastalǵan velosherý 15 shaǵyn aýdandaǵy teńiz jaǵalaýynda aıaqtaldy.
- Naýryz aıy Elbasynyń jarlyǵymen bekitilgen Alǵys aıtý kúninen bastaý alady. Oblys turǵyndary úshin bul mereke bir aıǵa sozyldy. Jeltoqsan aıynda bastalǵan «Asar-Jomart Júrek» qaıyrymdylyq marafony osy kóktemdi jalǵasyn tapty. Sonyń aıasynda Mańǵystaý oblysyndaǵy 6 300 áleýmettik az qamtylǵan otbasyǵa 55 mln. teńgeden astam qarjyǵa kómek kórsetildi.
Búgin «Asar-Jomart Júrek» aksııasynyń qorytyndylap, biz barsha mańǵystaýlyqtardyń dástúrli jáne súıikti sportyna aınalǵan velojarys ótkizýdi bastaımyz. О́zderińiz biletindeı, deni saýdyń – jany saý! Elbasymyz «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty joldaýynda «Salamatty ómir saltyn nasıhattaı otyryp, qoǵamdyq densaýlyqty basqarý isin kúsheıtý kerek. Jastardyń reprodýktıvti densaýlyǵyn qorǵaýǵa jáne nyǵaıtýǵa erekshe nazar aýdarý qajet» degen bolatyn. Sondyqtan búgin men salaýatty ómir saltyn nasıhattaý aıynyń bastalýyn jarııalaımyn, onyń barysynda oblys boıynsha sport túrlerinen jarystar, týrnırler men chempıonattar ótkiziledi, dedi velosheýrge qatysqan oblys ákimi Eraly Toǵjanov.
Sondaı-aq, «Asar» qaıyrymdylyq aksııanyń aıasynda aımaq basshysy áleýmettik jaǵdaıy tómen otbasyndaǵy balalarǵa velosıped syıǵa tartyldy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy